نكشات زيد ابو قراد / التبويس

التبويس
من نكشات العبقري زيد أبو قراد
بقلم: صالح صلاح شبانة
Shabanah2007@yahoo.com
يا جماعة الخير ، السلام عليكم ورحمة الله وبركاته....
والله ماني عارف ها لموضوع اللي بدي ألطِّش فيه اليوم هو موضوع قديم ولاَّ جديد ، بس خلينا نسميه موضوع قديم جديد ، ما منه فكه ، ملزق في رقابنا ولا القراده في ذنين الغنم ..!!
فقديم من ناحية اتعرضنا له قبل هالمرّه مرّات ، وجديد من ناحية إنّا لا زلنا عايشين فيه ، لليوم وبكره وبعده مثل ما قال زميلي المرحوم عبد الحليم حافظ ، قرابة صاحبي اللدود أبو صلاح ، اللي مشرشحني معه ، كل ما أكلت عنده لقمة جبز ، ولاّ أطعمني حبة قطايف في غير رمضان ، بس في رمضان وجاد عنده وعند غيره ...!!!
عدم المؤاخذه (قوربنا) شويه ، وخلينا نرجع للموضوع أفيد ..!!
طبعا العطور ذوق ومزاج ، وكل واحد حر يحط العطر اللي بده اياه ، من الكارتير لبول النياق ، بس رحمه بالناس يتجنب ها لعطور الزيتية الفاقعه اللي بتبنج على ريحتها الضبع ، وبتمسكه مسك اليد مثل العصفور لِمقنوِّر لما اتحط الضو في عنيه في الليل ..!!
هذاك اليوم بقت مناسبة ، واحنا بسم الله ما شاء الله عنا عادة التبويس ولِمباوسه لأبو موزه ، وكل واحد ريحة ها لعطر الثقيل الفايحه بشكل غير معقول، اللي بتلف الدماغ ، وبتصرع البني آدم ولا عيون زميلتي كلودا الشمالي ...!!! ولما يبوس ببوس بقلب ورب ، ما بصدق وهو يلوح فيك ، وكأنه عنده جوع بوسي مزمن ...!!
وفي ناس مثل أفضالي عندهم حساسيه من العطور الثقيلة ، وبعض الأنواع الخفيفه من الثقيله وغاد ، بس يشمها بغيطن وبسَطِّل وببلش يعاطس ، ورشح وزكام والذي منه ، لما يصير منخاره مثل راس الفجل من قد ما بدهكه في ها لمناديل ، الله لا يبارك بهذيك البوسه المنحوسه
اللي خرّبَت الديار العامره....!!!
وعادة البوس ، بغض النظر عن لعطور الثقيله ولاَّ غيرها ، عاده لا تنبئ عن محبه ولا عن عواطف وأشواق ولا غيرها ، كلها كذب ونفاق وتبزق على الشوارب واللحى للزلام ، وللخدود لِمزوقه بالنسبه للنسوان ، وهي عباره عن طقس ثقيل من طقوس النفاق والدجل ، وبوس الأيادي ضحك على اللحى ...!!!
وأنا شخصيا اللي ثار مبيت على البوس وبحقد عليه ، لأني بقيت مرّه عامل عمليه جراحيه للقلب والشرايين ، في شهر واحد والسقعه والبرد والزمهرير إشي مش معقول ، والكل مرَشِّح ومزكم ومش شايف الفضا ، وأنا ملحم من الجروح وفتح القفص الصدري وماكل روح الخل !!
إجا واحد الله يجزيه الخير مفلوز ، ومليح اللي ما بقى يومها انفلونزا طيور ولا انفلونزا خنازير ، وطقني كذا بوسه ، وكيفك يا أبو قراد ، والحمد لله على سلامتك يا ابو قراد ، وتعيش وتظل تنفض قلبك افرهولات يا ابو قراد ... وبعدين أخونا ودعني بعد ما أهداني فايروس الإنفلونزا ، والله لا يحط حدا محلي ، هرا نعمتي هريان ودمرني تدمير ...!!!
واظل ثلاث تشهر في لِفراش ما أذوق النوم إلا خطف مثل العصافير لبين ما لحم عظم القفص الصدري ، وقدرت أقوم من لِفراش ...!!!
طيب ، أنا مش بقيت في غِنى عن هذيك البوسه القِشْرَه ولو قاللي أنا مفلوز اعذرني عن البوسه؟؟ محروق الجنب اللي نام عليه أبو هذيك البوسه المشؤومه...!!!
على كل حال كل ها لحكي مثل عدمه ، وجكر فيّ غير التبويس يزيد ،ويعملوله عيد ، والله يجعله يبقى من المبوسين ناس معهم انفلونزا طيور ، وخنازير وضفادع منهن وغاد مشان ينبسطوا الفرنسيين ، ويصيب سارزوكي انفلونزا ضفادع على وجبة غدا يوم أحد وهو رايح على إسرائيل بلكي أعدى النتن ياهو ، وتسفي ليفني ، وأعدت أبو الغيط .. وصارت لِنفولونزا سلطة .. ولا حدا حوّش ...!!!
يا جماعة الخير عادة التبويس عادة متأصله فينا ، مع انها بتكشف مرّات لعيوب ، مثل ريحة الثِم وغيرها ، وياريت اللي ببقى مريض ولاّ مفلوز يعتذر عن البوسه ، واللي معطر بعطر جهنمي ، ورح نقول له :
شكرا يا نشمي ، ميرسيه يا زلمه (بالفرنساوي) ،ثانك يو مان ، موشو جراسيه سنيور...،
وخاطركم مع السلامه...،
تقرأ بلهجة أهل سنجل

زيد أبو قراد شخصية جدلية ، بجسد وسلوك واسلوب صديقي زيد أبو قراد ، التقيته في نيويورك ، وشاء الله ان استعمله وعاء لنكشاتي ، وهو معي اينما أكون ، ولكن بعقلي أنا لا هو ، لأنني أزعم وكل من يعرفني أن عقله لا يساوي هلله سعودية ، ولا قرش سوري ، أو لبناني وكان اسمه زيد أبو فراس ، فأسمه زيد وابنه فراس ، ولكن لأن أكتافه عريضة كاللوح وقوي كالبغل كما أصفه ، وكان اسم محافظ رام الله آنذاك أبو فراس قمنا بالأتفاق بتغيير أسمه منعا للأحراج ، وأسميته زيد أبو قراد ، لأنه أشبه بالقرادة التي تلتصق بالرقبة ..!!!
أذعت له 600 نكشة ، ولدي عدد كبير لم يذع ، ومنه ما هو منشور ، كون ما أذيع بقي في سنجل ـ رام الله ، وبأمكاني أن أكتب كل يوم نكشة أو أكثر فهو وعاء لأي قضية كان ، ومادة خصبة للتأليف..!!
ما كتبته لكم سيرة ذاتية لزيد أبو قراد ..!!

شكرا الك
استاذنا الكريم
على هذه العبارات والكلمات
الممزوجه بالاحاسيس الصادقه

تقبل مروري

روعة جداً ما كتبته
واحساسك فاق كل الروائع