النكتة والطرفة الفلاحية / 1

صالح صلاح شبانة: كاتب فلسطيني; عدد المساهمات : 75
الجنس :
العمر : 71
العمل : متقاعد
المزاج : رايق

مساهمة رقم 1

النكتة والطرفة الفلاحية / 1

من طرف صالح صلاح شبانة الخميس يونيو 10, 2010 3:27 am

النكتة والطرفة الفلاّحية ــ 1

طرائف من حياة وذاكرة القرية
جمع وإعداد : الداعي بالخير: صالح صلاح شبانة
Shabanah2007@yahoo.com

ما بين أيديكم فصل مسرحي جمعنا فيه أكبر عدد ممكن ، من نكات وطرائف القرية قمت بجمعها شفويا من الناس ، وقد كنت أذيعها من برنامجي اليومي (الداعي بالخير) الذي كنت أبثه خلال المدة الواقعة ما بين(1998 ــ 2000 م ) من إذاعة صوت الحب والسلام ــ رام الله ـ فلسطين ، في محاولة لتدوينها ، أرجو أن أكون قد وُفقت بهذه المهمة ، والله الموفق .

لِخويتمه :ـ
بقوا زمان يلعبوا لعبه اسمها لِخويتمه ، وعن شرط ، عشا ، ولاّ حلو ، وشو حلوهم زمان غير لِبسيسه والقطين ، والزبيب ، ولاّ القليه ، ولاَّ بندوره مسطحه ناشفه من أيام الصيف ، يوكلوها في الشتوية ، ولاَّ يبقى الشرط عن عزاره وبهدله ..، المهم انه الشرط يتنفذ ، ويا ويل اللي بجوبن وبتراجع ، عمر ما حدا بحكي معه ولا بلعب معه ولا بتعامل معه ، اللي أوله شرط آخره نور ،هيذ بقوا الناس ...!!!
ولعبة لِخويتمه ، بقوا يصفوا (12) فنجان عل صينيه ، ويحطوا تحت واحد منهن خاتم ، واللي بسألوه بده يحزر تحت أي خاتم الفنجان ، ومسموح له يغلط مرّه واحده ، وان ما حزر بده يلبس الشرط اللي اتفقوا عليه ..!!!
إذا ببقى بهدله ولاَّ عزاره بدهم يركبوه مثل لِحمار ، بدهم يحلقوله لحيته بالكندره ، بدهم يبزقوا عليه ، ومرات يربطوا في رقبته رسن مثل الكلب ويصيرو يشحطوا فيه ، وبده يتحمل ، وبقى يتحمل ولا حدا يعايره ويقول له : إنت ولد ، وعيب عَ الزلم ينكثوا ويتراجعوا ...!!!
وفي اصول لعبة لِخويتمه الراكب اليوم مركوب بكره ، والخسران اليوم ربحان بكره ، وكاس وجاري على كل الناس .....!!!!
ساق الله على هذيك لِيّام ، بقى الواحد يطول اللقمه ويحطها في ثِم أخوه ، بقى عند الناس محبه وإيثار ...، مش مثل ها لِيام صار الواحد يحلب النمله ويفلي البرغوث ....!!!
قبل نفسك عز صاحبك :
يوم من لِيّام بقت الناس في مجاعة ، ولا ملاقيين رغيف خبز شعير ، ولا كردوش من طحين لِذّرَه ، بطونهم امقرّحه من الجوع والقِلّه ، إجا واحد معيِّل لواحد عنده اولاد أكثر منه وسأله :
ــ ما بلاقيش يا بو محمود عندك شوال شعير لحين ميسره ، ربنا يفرجها علينا وعليك ..!!
أبو محمود تفاجأ بها لطلب ، لأنه ما عنده غير شوال واحد لولاده اللي بقرطوا الصوّان ، بس مش حاتم الطائي لحاله اللي بقى كريم وذبح الفرس ، أبو محمود آثر على نفسه يظل بالجوع هو واولاده ، ولا يرد الزلمه خايب ، بعد ما اتعشم فيه وألقى عليه حمله ، قال له : ودي واحد من اولادك يوخذ كيس الشعير ، ولمّا روّح وقال لمرته عن اللي جرى وصار ، صارت تلدح و تلطم وفتحت في الدار مناحه ، وتقول : هاتولي القدره ، بدي أسخِم وجهي ، بس أبو محمود قال لها بحزم : وفري دموعك وصوتك لبين ما الزلمه ييجي يوخذ الشوال ، وبعدين بنجيب القدره ، وبتسخم أن واياك سوا ، واعطى الكيس لغيره وخلا اولاده بالجوع ...!!!

مين يا ترى بعملها ها لِيام ..؟؟ أنا شخصيا ما بعملها ، واذا ولا بُد أعملها ، بقول له : تع خذلك صاع ، صاعين ، نص الشوال ، بمشي أموره وأموري ، بس هو بقى أكبر من كل زماننا الرخو اللي ما فيه خير ...!!!

أنا يا جماعه هلقيت أستاذ في التاريخ ، بقيت قبل ما أهبرت ويكبوني في الدار متقاعد ، وهي الصحيح : مُت قاعد يا أبو ياسين ، وهذا أنا ... راحت أيام الغوش والحركه ، وانكتم صوتي اللي بقى يرعد في صفوف المدارس ، وقدّيش جيل وجيل أنشأت وربّيت ، ، علمتهم التاريخ ، وانا طول عمري متحيز للتاريخ، وبعرف انها ها لنتاتيف الزغيره بتشكل ذاكرة شعب ، والشعب اللي عنده ذاكره عمره ما بموت ...!!!
في كل لحظه من حياتنا حدث ، وفي كل حدث فعل ، والحياة مصيرها خراريف ..، مجرد شريط زغير بمر من قدام عيوننا بلحظه ...!!
ولسه بتذكر أبو العبد اللي بقت طيارات العدو تلاحق فيهم قصف وقتل وهمه هايمين على وجههم والجلا ....!!
الناس في المرارة والخوف والطيارات نازله قتل .. بالنابالم .. اللي بقى يومها سلاح خطير ، قبل ما تطلع الأسلحة ملعونة الوالدين والشاهدين ، اللي قاعدين الله ينتقم منهم كل ما طلع سلاح جديد ، بفتعلوا حرب مشان يجربوا ها لأسلحه المجرمة على الأبرياء الضعفاء ، وما بدنا نحكي ... وخليها على الله وبس ..!!
انبطحي يَمّ العبد :ـ
أبو العبد وأم العبد في السبعين من عمرهم طالعين بالخلا مع الطالعين ، وكل ما مرقت طياره معاديه يوخذوا الأرض على وجوههم !!
مرقت الطيارة توِّز وز ، أبو العبد خاف على أم العبد ، صرّخ عليها : إنبطحي يَمّ العبد انبطحي ...!! أم العبد زعلت وقالت : عزا في دار اليهود .. هو وقته يا بو العبد ؟؟ ... وانتوا عاد شوفوا قديش تفكير أم العبد رغم الموت والقتل والخوف ، أخذت على هذاك الإتجاه ...!!!
أيام مليانه أحداث ، ومليانه خراريف ، بتروح أدراج الريح ما حدا بوخذ باله منها ، بقولك أيش ؟؟ هذا غسيل وسخ ، ما بدنا ننشره ... ولمّا ننشره بنلاقيه حضاره ضاربه شروشها جوّه الصخر .. وهي اللي بتشكل الهويه الثقافية والحاضريه إلنا ...!!!

http://www4.0zz0.com/2010/03/27/12/668939012.jpg