وصايا ستي / الجنون

وصايا ستي
الجنون
وصايا مفعمة بالحكمة الشعبية بقلب ونبض ستي
بقلم الداعي بالخير : صالح صلاح شبانة
Shabanah2007@yahoo.com

Shabanah2007@yahoo.com
بقت ستي رحمة الله عليها تقول لي : إسمع يا ستي ، الدنيا ما إلها أمان ، فإذا بتبات وبتصبح عَ خير ، إحمد ربك عَ نعمة الدين والعقل والصحه ، لأنه قديش واحد أمسى مؤمن وأصبح جاحد ، وقديش أمسى عاقل وأصبح مجنون ، وقديش أمسى مثل الجمل واصبح عَ الجبّانه محمول عَ الحدبا في النعش عَ القبر اللي بقى فاتح له ثمه مستنيه وهو عنه غافل .

وإذا واحد يا ستي بده يحمد ربنا ، يحمده أولاً عَ نعمة العقل ، لأنه الدين والإيمان والحياء والضمير وكل شيء وهبه ربنا للإنسان تابع للعقل ، وإذا العقل إنعطب ، كل إشي انعطب وراه ،

ولو زال العقل كل إشي زال وراه ، يم كفك عليه !!

وإذا أصبح العقل سليم وبخير ، أصبحت إنت ودينك وإيمانك ومالك وعيالك وكل ما تملك من حطام الدنيا بخير ، أما الأخره فعلمها عند علاّم لِغيوب سبحانه في مكانه .

واللي سبحانه ربنا تبارك وتعالى ببتليه في عقله ، مش نقول : الله يعينه على ما ابتلاه ، ونحمد ربنا اللي حفظ علينا العقل ، وما ابتلانا مثل ما ابتلاه ، مع إنه سبحانه تبارك وتعالى قدير يشافيه من اللي فيه ويبلانا فيما ابتلاه .

المجنون بنتقل من عالم لعالم ، وبسقط عنه كل إعتبار ، وما حدا بسأله أيش بتساوي ولا ليش بتعمل لأنه (إذا أخذ ما أوهب أسقط ما أوجب) ، بس المجنون ما بشوف (عقل أوفى ولا أحسن من عقله ولا سلوك أحسن من سلوكه) لأنه صار له عالم جديد ، وإحنا يا ستي بدل ما نتعاطف معه ، بنصير نضحك ونتمسخر عليه ، فأنت يا أبن الحلال ، ما سألت نفسك : ليش ها لمجنون إنجن ؟؟الله من عالي سماه يشافيه ويعافيه .

انت يا ستي بتقدر توخذ عبره من المجنون ، واللي صار في المجنون ، مشان انت يا لعاقل ما تتصرف مثله وانت بتتدعي انه عندك عقل ، وقال المثل يا ستي : (أعطوا المجنون صُفَّاره قام خرَّب الحاره ) ، وقديش يا ستي واحد عاقل بعطي ابنه سياره مشان يطرطع فيها في الحاره ، وهون بقولوا (مجنون رمى في بير حجر ، ميت 100عاقل ما أطلعوه) ، وقديش واحد بقول كلمه بخرّبَ فيها بلاد عامره مشان يمزح ، ولاَّ يضحَّك الناس تيبين قدام الناس انه خفيف دم ، مع العلم إنها خفة الدم من عند الله ، الإنسان ما الو فيها !!!

أنوه بذمتك يا ستي أحسن هذاك المجنون اللي رمى الحجر في البير ولاَّ العاقل اللي بصَرِّف اللي في بطنه من ثمه لمَّا يحكي ؟؟؟

يا ستي الله يرضى عليك ، الجنون ما حدا يتمناه ، بس في ناس بخلطوا الهبل بالخباثه وواحدهم مرّات بعمل حاله مجنون مشان يقضي حاجه ما بتنقضي للعاقل ، يعني بتمجنن تيقضي حاجته ، بس يا خوف قلبي يصير فيه على رأي المثل (أخر التجنان جنان) !!

في ناس يا ستي بتفلسفوا وبقولوا : (جنون ينفعك ولا عقل يضرك) ، مثل ما بقولن بعض النسوان اللي عندهن جيزان مش ولا بد (حمار تركبيه ولا حصان تسوقيه) !!

العقل نعمه ، وجايز الجنون يبقى نعمه ، لأنه المجنون بملك الدنيا !!

يوم يا ستي ربنا سبحانه وتعالى خلق أبونا آدم سأله وهو فيه أعلم :

شو بتختار يا آدم ، العقل ولاّ الدين ولاّ الحياء ؟؟

قال: أنا يارب بختار العقل . هون الدين والحياء قالن : إحنا إنأمرنا نكون مطرح ما العقل يكون.

فاللي عنده عقل عنده حيا ودين ، واللي ما عنده عقل لا عنده حيا ولا عنده دين !!!

وسلامة فهمك يا ستي .

وصايا ستي كانت أحد أركان برنامجي الأذاعي المرحوم (لقاء الداعي بالخي) من صوت الحب والسلام في رام الله ، وقد أذعت منها 100 وصية ، وفي راديو أجيال 50 وصية ، ولدي نحو 200 وصية لم تذع ، وهذه منها ...!!!
المشكلة هي في الصف والتنضيد على الكمبيوتر لتصبح صالحة للنشر ... والله يعيننا على المشوار ..!!
شكرا لكم لرعايتها بالمرور والتوقيع ، وأرجو أن تكون الفائدة منها كبيرة .

انت نبع من الابداع
بوح عذب بعطر الحب
ينثر الغرام فوق سطور الحب
دمت بخير

ارتشفت منا العيون اجمل الاحساسيس سلمَ فيك هذا النبض
ودمت بالحب غارق
لـ تنهل علينا جميل بوحك
تقبل حضوري في صرحك الجمال مع خالص الاحترام
زهور الياسمين لشخصك

شكرا الك
استاذنا الكريم
على هذه العبارات والكلمات
الممزوجه بالاحاسيس الصادقه

تقبل مروري

روعة جداً ما كتبته
واحساسك فاق كل الروائع